ЖАҢАЛЫҚТАР

Назарларыңызға TAISOIGAN.KZ  жаңа интернет-сайт ұсынып отырмыз. Мақсатымыз: еліміздің, жеріміздің тарихын зерттеу, ұмыт қалған есімдерді қайта жандандыру, ұрпақ сабақтастығын арттыру жұмыстарын насихаттау болып табылады.

Атырау мұнай және газ университеті балалар арасында спорттық ойындардың жеті түрі бойынша жарыс өткізді. Жарыс соңында жеңімпаздарға түрлі сыйлықтар тапсырды. Салауаттылық өмір салтын насихаттау мақсатында бұл университет мұндай шараларды жиі өткізіп келетінін айта кеткен жөн. Наурыз айында халқымыздың «амал» дәстүріне арнап, ұлттық ойындарының фестивалі өткен болатын. Профессор Еркін Төлегенов басшылық ететін «Дене тәрбиесі және спорт кафедрасы» мүшелері бұл фестивальға кеңінен ат салысты. Нәтижесінде осы университеттің көптеген студенттері жүлделі орынға ие болды.

Жақында, Мамытбек Қалдыбайдың «Мен қазақтың баласы» атты жаңа кітабы жарық көрді. Белгілі жазушы бұл кітабында даңқты қолбасшы, әскери ғалым болған Бауыржан Момышұлының өмірінен сыр шертіп, оған психологиялық портрет жасаған екен. Кітапқа енген туындылар бұрын-соңды айтылмаған жаңа оқиғаларға толы, тілі көркем. Талғампаз оқырманның жан дүниесін баурап аларлық тәрбиелік әрі танымдық мәні терең шығарма болып табылады.

Жуырда «Ауған соғысындағы Атыраулық жауынгерлер шежіресі» деп аталатын жинақ жарық көрді. Бұл жинаққа Ауғанстанда интернационалдық борышын атқарған 500-ге жуық атыраулық жауынгерлердің өмірбаяны енгізіліпті. Жинақтың авторы- филология ғылымдарының кандидаты Айгүл Ермекова бүгінгі таңда Атырау мұнай және газ университетінде доцент болып қызмет атқарады. Автор бұл жинақпен шектеліп қалмайтынын, «Қара майор» деген атпен кеңінен танымал болған ауған соғысының батыры болған гвардия полковнигі Керімбаев Борис Төкенұлы туралы және т.б. батырлар туралы документалды фильмдер түсіру жоспарында бар екенін бізбен бөлісті. Айта кететін жайт, мұндай энциклопедиялық еңбек елімізде тек қана атыраулық жауынгерлер жөнінде жарық көрген екен. Жас ғалым әрі жазушы Айгүл Ермековаға шығармашылық табыс тілейік.